Felddienst-, Feldzug oder Beuteordnung der Stadt Soest von 1445

StA Soest, Bestand A, Altsignatur, Lent XX 205, 107, ca. 1445

1979
Gode, Marien syner werden moder, dem guden hern Patroclus ind allen
hilgen to werdicheit ind eren der stat soist ind dem gemeynen gude tom
besten ind nutticheit synt burgermestere rait dey twelve ämpte broderschope
ind dey gemeynheit eyndrechtliken overkomen in maten hyrna
geschreven steyt:

1980
Item off men overqueme, dat men uitteyn wolde vor eyne stat slot vestinge
eder anders umb eventur to versoyken, wan men dan dasrto dey klocken
yderman horsam syn, hey sy here eder knecht ryke eder arem; wey des
nicht en dede, dey solde eyne halve marck brecken, yd en wer dan sake,
dat hay van lyvesnoir darheme bleve, in to sulken typen sall ydermann
in dem velde horsam syn by dem vurg. brocke; ind wey hyrvor bede,
dey solde eyne marck gelden sunder gnade.

1981
Item als men to velde were ind myt den vyanden to mangelen queme eder
komen solde, wey dan anders dede dan em bevolen were eder eynige yacht
off update makede anders dan men (van unß junckern ind) van der van
Soist wegen overkome were eder unsen vrunden entflöge, dem solde men
an syn lyff ind gut tasten ind sich daran halden.

1982
Item off men dey klocken sloige eder eyn gerochte queme, dat dey vyande
in dem velde weren, so dat men darumb uitteyn wolde, so sal yderman
myt syme harnsche ind dyner wer to pferde ind voite, hey sy here eder
knecht, vor dey porten komen, darhen dey vyande synt; ind nummant
en sal to voite noch to pferde vorder yagen dan malck dey sal vor der porten
ind bynnen den nesten slyngen blyven so lange wynte men des tovreden
wert van des raides ind der twelven wegen, wes men don solle;

1983
wat dan deyghene, hey sy remester off anders, wem dat bevolen ys, don
heytet, dat sall yderman don; ind off men ok up dey tyde dey perde ruyter
sementlichen off erer eyn deel vorhen schickede, den en sal men nicht
navolgen, men en sy des dan overkomen, den to volgen;

1984
ind wey des so nicht en heylde, hey were van dem raide dem alden raide
den twelven van den ampten eder der gemeynheit rike eder arm nummant
darvan uitgescheden, dey solde achte dage in dem raithove in dem stocke
sitten water ind broit eten, way darvor bede, dey solde eyn marck breken
sunder gnade, ind wey dyt anderwerff verbreke, dey solde drey wecken
in dem raithove sitten water ind broit eten; ind wey dat derdewerff verbreke,
den solde men myt wyff ind kindere uite Soist drywen

1985
Tom ersten als sich dat makende worde dat men vyn gemeynen bode
eder overmitz eyme klockenslage umb eventur over dey vyande to soyken
eder anders dey vyande to schedigen uittoge, darover God den von Soist
eventur geve, so dat men have ind gude men den vyanden affgewunnen
hedde, butende worde, so solde men dat myt der bute halden als hyr
navolget: dat erste wes men Gode off den hilgen betekende off geve, des
en solde men nicht buten, dan men solde dat geven den dat van der holgen
wegen bevolen worde, dat up dat uterste to verkopen.

1986
Item so sal yderman vort ther bute brengen wes hey den vyanden
affgewunnen gerovet off kregen hedde, dat sy an reysiger have harnsche
off anders welkerleyge dat were, nicht darvon uitgescheden.

1987
Item als men dey bute gedan hefft ind dey malkem gevende wert, so sal
men eyme reysener ind demghene, dey to perde in syme harnsche medegewest
ys, twe deel geven, ind dey reyseners ind dey also dem twe del
der buten enfän sal, dey sal them mynnesten eyn pantzer, einen kragen
ind ysenhoit aneheb, uitgeseget off welck schutte darmede were, dey
eynen schilt vorde, ind sulkes harnsches nicht al en hedde, dey salde
gelikewol sulke bute hebn.

1988
Item way to voite mede in dem velse ind dem gescheffte off mangelinge
were, dey eyn pantzer ysennhoit krage off hundeskogel anehedde, dey
solde den derden del ther bute hebben int entfaen, ind way van den
voitluden geyn pantzer anhedde ind eyne bort, eynen schot ysennhoit
kragen off, hundeskogel anehedde, dey solde ok sulke bute als den derden
deel hebn, ind dusse voitlude, dey sullen malck eynen guden peynck eder
eyne gude beslagene kulen vor den peyck, eyne worpbarden eder eyn
gut nagelmes vor dey worpbarden dregen, dey gut syn ind ther wer dogen.

1989
Item dey bussenschutters ind dey armbrostschutten, dey to vyote medesynt,
dey sollen desgeliken den derden deel ther bute hebn.

1990
Item way to vyote blot mede were ind geyn harnsch anehedde dan eynen
ysern hoit, dey sal den veyrden deel there bute hebben ind dey
voytlude sollen ok malck eynen guden peyck eder eyne gude beslagene
kule vor dem peyck, eyen worpbarden eder eyn nagelmes vor dey worpbarden hebn.